PASO DO ESTREITO
nós éramos de todo:
da fala e da canción das árbores figueiras
das praias sementadas de sombra e dunha luz
con que se abren as portas para fuxir do medo
lavamos a tristura nunha caixa de lata
decorada con flores e paxaros azuis
un fio de lembranzas a foto da muller
un idioma que canta e un olvido doente
para non regresar porque fuximos mortos
e o mar dentro de nós e a noite polo mar
a noite contra o vento
ali na beira agardan
exércitos armadosque non deixan pasar
e o faro ardendo alto sobre a illa das pombas
contra a illa das pombas
o vento entrando fura
a terra en corredores
secretos soterraños
as árbores quiemadas na banda do solpor
e polas rúas andan
desesperados bébedos
e mulleres profundas que preguntan ao mar
o mar era tan grande!
nós éramos todo
na noite contra o vento
a xete só di números:
trescentos afogados debaixo da cruz branca
(Colección de espellos, ESPIRAL MAIOR- A Illa Verde 1994)
