un, outro, único sempre, poema de Carvalho Calero

 De Carvalho Calero.

Cando estou bêbada do teu vinho, todo é formoso. 

A beleza nom tem limites, 

nom tem limites o amor. 

Todo tu, toda eu, 

todo o que fagas, 

todo o que faga, 

todo és divino, toda som divina, 

todo é divino. É um mistério sacro 

a nossa paixom. Umha liturgia 

de iniciaçom mil vezes repetida, 

em que efemeramente 

conquistamos a eternidade. 

Um sonho no cadulho do além, 

um retorno ao pedido paraíso. 

Chegamos, nocturnos, à soleira do Edem, 

nus como Deus nos fijo, de maos dadas. 

O Anjo embainha a espada. Entramos. 

Nom hai nada proibido. À sombra da árvore deitamo-nos da ciência, 

mordendo os frutos de ouro. 

Nom hai serpente. Nom hai maldiçom. 

Nom hai pecado. Nom hai mal. Hai só 

a noite como um leito, as estrelas 

como lâmpadas, o amor como um vinho 

que me transporta, e ao derramar-se, tinge 

de beleza o meu corpo, o teu, os beijos, 

a orgia, a comunhom 

de ti, de mim, de Deus. Todo é formoso, 

o que me ocorre, o que imagino, o que 

vivo, o que sonho, cando 

estou bêbada do teu vinho. 

Todo é formoso entom.